காலித் மிஷ்அலின் காஸா விஜயம் சொல்லும் செய்தி

காஸா மீது இஸ்ரேல் கட்டவிழ்த்துவிட்ட சமீபத்திய வன்முறையைத் தொடர்ந்து ஹமாஸின் 25 வருட பூர்த்தி விழா அண்மையில் நடைபெற்றுள்ளது. இதில் கலந்து கொள்வதற்காக அதன் அரசியல் பிரிவுத் தலைவர் காலித் மிஷ்அல் காஸா சென்றமை சர்வதேச அரசியல் நகர்வின் புதிய திசையை சுட்டுவதாக உள்ளது. இந்த நிகழ்வு அரபு வசந்தத்துக்கு முன்னர் நிகழுவதாயின் கடும் இரகசியமாக சில மணிநேரங்களுக்கெ அவரது விஜயம் நிகழ்ந்திருக்கும். ஆனால், அரபு வசந்தத்தின் விளைவுகளை அனுபவிக்கத் தொடங்கியிருக்கும் காஸாவில் இவரது விஜயம் பகிரங்கமாகவே நிகழ்ந்தது.

காலித் மிஷ்அலின் காஸா விஜயம் சில முக்கியமான செய்திகளைச் சொல்கின்றது.

• காலித் மிஷ்அலை வரவேற்பதற்கு பலஸ்தீனில் செயற்படும் அனைத்துக் குழுக்களும் பெரும்திரளான பொது மக்களும் வருகை தந்திருந்தனர். இந்த நிகழ்வு காலித் மிஷ்அலை ஹமாஸின் பிரதிநிதி என்று மட்டுமல்லாது ஒரு தேசிய ஆளுமை என்ற நிலைக்கு உயர்த்தியுள்ளது.

• ஹமாஸ் இயக்கம் மக்கள் அபிமானத்தையும் நம்பிக்கையும் ஆதரவையும் பெற்ற ஒரு இயக்கம். ஹமாஸை எதிர்ப்பவர்கள் ஹமாஸை அங்கீகரிப்பதனைத் தவிர வேறு வழியில்லை.

• பலஸ்தீன அரசியல் ஒழுங்கில் ஏற்பட்டுள்ள மாற்றங்களை பலஸ்தீன விடுதலை இயக்கம் (PLO) புரிந்து கொண்டு, தேசிய ஒருமைப்பாட்டுக்காகவும் நலனுக்காகவும் ஹமாஸுடன் நல்லுறவைப் பேண வேண்டும்.